ശ്രീ നീലകേശി ക്ഷേത്രം

മാരായമുട്ടം

മഹാക്ഷേത്രങ്ങളുടെ ചരിത്രങ്ങൾ ഏറിയപങ്കും അറിയുന്നത് ഐതീഹ്യങ്ങളിലൂടെയാണ്. ഐതീഹ്യപർവ്വതത്തിന്റെ മൂർദ്ധാവിൽ സൂര്യശോഭയായി നിന്നിരുന്ന തിരുവിതാംകൂറിലെ പ്രകൃതിരമണീയമായ ഗ്രാമമാണ് മാരായമുട്ടം. തിരുവനന്തപുരം ജില്ലയിൽ നെയ്യാറ്റിൻകര താലൂക്കിൽ പെരുങ്കടവിള വില്ലേജിൽ ഉൾപ്പെട്ട ഈ പ്രദേശം ഒട്ടനവധി ചരിത്രകഥകളുടെ വിള ഭൂമിയാണ്. ഉപജാപകവൃന്ദത്തിന്റെ നിരന്തരമായ ആക്രമണങ്ങളെ അതിജീവിക്കിക്കുന്നതിനായി അനിഴം തിരുനാൾ മാർത്താണ്ഡവർമ്മ മഹാരാജാവ് ദേശങ്ങൾ തോറും സഞ്ചരിക്കുന്ന കാലത്ത് ഈ പ്രദേശത്ത് എത്തിച്ചേർന്നു എന്നും, അന്ന് ഘോരവനമായിരുന്ന ഇവിടെ വച്ച് അദ്ദേഹത്തിന് വഴിമുട്ടിപ്പോയി എന്നും മഹാരാജാവിന് വഴിമുട്ടിപ്പോയ സ്ഥലം - മഹാരാജമുട്ടവും", കാലാന്തരത്തിൽ ലോപിച്ച് 'മാരായമുട്ടവും' ആയിത്തീർന്നു എന്ന് പഴമക്കാർ പറയുന്നു ഇത്തരത്തിൽ ഇന്ന് മാരായമുട്ടം എന്ന് പ്രസിദ്ധമായ പ്രദേശത്ത് നൂറ്റാണ്ടുകൾക്ക് മുൻപ് ഉദയം ചെയ്ത് സർവ്വചരാചരങ്ങൾക്കും അമ്മയായി മാതൃവാത്സല്യം ചൊരിഞ്ഞുകൊണ്ട്, അത്യപൂർവമായ വൃക്ഷലതാദികളാൽ നിബിഢമായതും, കേന്ദ്രസർക്കാരിന്റെ ഊർജ്ജിത ജൈവവൈവിധ്യ മേഖലയിലും, ദിശാസൂചികയിലും ഉൾപെട്ടതും, കേരള വനം വകുപ്പിന്റെ പ്രത്യേക പരിഗണന ലഭിച്ചിട്ടുള്ളതുമായ തൃക്കാവിനുള്ളിൽ സ്ഥിതിചെയ്യുന്ന 'മാരായമുട്ടം ശ്രീ നീലകേശി ക്ഷേത്രത്തിൽ' വാണരുളുന്ന അനുപമ ചൈതന്യമാണ്‌ "മാരായമുട്ടത്തമ്മ".